ايه يامه ؟؟

ايه يامه اللى حصل فيكى ؟ ليه يامه كل حاجة فيكى اتغيرت ؟ يامه مش عارفين نعيش فيكى خلاص . طيب نعمل ايه نسيبك يعنى بس هنروح فين يامه . هو احنا لينا غيرك برضه . يامه انتى عارفه اللى حاصل فيكى ؟ انتى حاسه بينا يامه ؟ حاسه بابنك المطحون يامه شوارعك عادت زحمة أووى - والله بجد يامه - معدش فيه هوا نضيف نتنفسه فيكى . يامه احنا مش عايشين خلاص عارفه يامه اللى بيتعب فينا بيعملوا فيه ايه ؟ بيموتوه والله يامه . بيودوه مستشفى حكومى يترمى على البلاط لما يموت والله يامه ما بفترى على حد بس هو ده اللى بيحصل عارفه يامه ان المياه فيكى ملوثة والله العظيم بتجيب فشل كلوى شوفتى الحال وصل لفين بعد مكنتى مشهورة بنيلك . عارفه يامه اننا مش لاقيين رغيف العيش؟ والله بجد احنا مش لاقيين قمح فى بلدنا عندنا أزمة يامه احنا خلاص انتهينا من زمان . - والله - عارفه يامه ان العيش بقوا يقفوا عليه طوابير والله بجد.طيب سمعتى ان فيه واحد من ولادك يامه اتقتل فى طابور علشان يجيب رغيف لعياله . يامه الحكاية مش أزمة عيش بس لا ده فى فيكى ازمة غاز كمان والله الحكاية يامه بقت صعبة أووى . فاكره يامه لما كان رمضان يجى ويقولوا شهر البركة والناس تاكل وكل حاجة متوفرة . يامه كيلو اللحمة بقى ب 60 جنيه يامه .الموظف يامه ميعرفش يعنى ايه لحمة . والله يامه ما يعرف . هو انتى يامه عارفه الكلام ده ولا انتى يامه نايمة ولا ايه ؟ والله يامه ساعات بيتهيألى انك لا سمح الله يعنى موتى والله بيجيلى احساس انك موتى من زمان . من ساعة ما الفقير بقى يبكى من الجوع ومحدش يحس بيه ولا يسأل عنه . من ساعة ما المريض بقى يترمى فى الشارع من غير علاج . من ساعة ما بقى أكلك مسرطن وهواك ملوث .اه يامه لو كان احساسى ده صح وانك موتى بجد هى دى الكارثة . أما لو نايمة يامه فاصحى والحقى العصابة اللى انتى سيباهم علينا يامه انتى مكنتى شلة حرامية مننا . ماسكينا سرقة ونهب يامه دول تقريبا ورثوكى مش عاملين حساب لحد بيقسموا فى خيرك بينهم واحنا ! احنا خلاص يامه بقينا خدم وعبيد فى البلد دى عارفه يامه العصابة دى مسلطه علينا شوية كلاب اه لو حد فتح بقوا واشتكى من الحال اه لوحد قال آه من الوجع اه لوحد اتألم مرة غصب عنه وصرخ تبقى وقعته سودة تتلم عليه الكلاب وتنهش من لحمه ممكن محدش عاد يعرف عنه حاجة بعدها وممكن برضه نلاقيه مرمى فى الشارع غرقان فى دمه ولو علّينا صوتنا كلنا وقلنا لاء كفاية كده ولا حد بيسمعنا كأننا مش موجودين أصلا . يامه احنا شوفنا العجايب . فى ناس من ولادك متنعمين فى خيرك واخدين كل حاجة واحنا يامه ضايعين فى أرضك مش لاقيين حاجة . يامه والله احنا تعبنا وقلنا نشتيكى لك يمكن يامه . يمكن يامه تصحى على صوتنا وتعرفى اننا محتاجينك أووى يامه . الظلم زاد فيكى أووى واحنا مش قادرين نواصل فيكى . فاكره يامه زمان لما كنتى أم الدنيا . دلوقتى يامه بناخد على دماغنا من كل الدنيا ومش قادرين نتكلم أو حتى نصرخ من الألم . فاكره يامه لما كان نيلك ملهم العشاق . يامه النهاردة احنا على وشك ان النيل يجف . هيبنوا السدود يامه والنيل هيقف مش يجيلنا . فاكره يامه لما كان لينا كلمه وسط الدول لما كن لينا دور مشهود بيه والكل عارف يعنى ايه مصر . كل ده يامه راح خلاص وبقينا مالناش فى وسط الدول كرامة ما خلاص بقى يامه انا مش قلتلك احنا ضعنا والسلام . طيب فاكره يامه لما كان يقولوا عليكى بلد الأمان . يامه خلاص معدش حد آمن على نفس فى بيته ماخلاص الحرامية فى كل مكان اتمليتى نصب وتزوير وتزييف . حتى المشاعر يامه الطيبة الابتسامة ضاعت من الوجوه عارفه يامه ولادك كلهم عندهم اكتئاب . بس احنا والله يامه مش زعلانين منك ماهو يامه برضه محدش بيزعل من أمه لو سبناكى يوم هنروح لمين غيرك . احنا بس يامه نفسنا تصحى شوية تشوفى حالنا وصل لفين ؟ تصحى تطمينينا انك عايشة . لسه عايشة ما موتيش ؟ اصحى يامه بقى ؟ اصحى يامه. يامه احنا ولادك بناديكى ولا انتى خلاص اتبريتى مننا .

هناك تعليق واحد:

ندا منير يقول...

بس خلاص انهاردة كل دا باذن الله هيتغير