أمريكا وإيران

أمريكا هتضرب ايران..........

ايران هتضرب أمريكا..........

أمريكا تستعد لإيران............

ايران تستعد لأمريكا...........

واحنا ؟

احنا المشجعين !!

ماشيين شوية نقول أمريكا، وشوية ايران...

وأهو كله زى بعضه.

أمريكا تضرب ايران، ايران تضرب أمريكا

واحنا مالنا،

على العموم سواء أمريكا أو ايران كله بيعمل لمصالحه

وأنا ما أقدرش ألوم حد لأنه عاوز مصلحته

لا بالعكس أنا أحترم هذه الدول لأنها تعمل لمصالحها

أنا ما قدرش ألوم الا أنفسنا

تقدر تقولى احنا عملنا ايه نواجه بيه الكارثة اللى ممكن تحصل لو قامت الحرب ؟

تقدر تقولى احنا هنكسب ايه لو ايران حصلت على الطاقة النووية ؟

أو تقدر تقولى احنا هنكسب ايه لو أمريكا ضربت ايران ؟

الحل الوحيد اننا نعتمد على أنفسنا

وبدل ما نقول ايران والنووى وغيره نحاول يبقى عندنا احنا نووى

أو حتى نحاول اننا نسلح الجيش بسلاح متطور

أو يبقى لنا قرار سياسى قوى وكلمة مسموعة بين الدول

بس هتقول ايه بقى أصل احنا حكومتنا حكومة ملاك

بالصلاة ع النبى كده من اللى سايق

أنا كمواطن محترم أحب أبقى عارف مين اللى سايقنى,

أيوة أمال أتساق من غير معرف مين اللى سايقنى .لأ طبعا .

طيب هتقول متساق ايه وبتاع ايه هو انت عربية (ده لأنك محترم ومش هتقول هو انت حمار)

بس للأسف عزيزى كلنا كده للأسف متساقين ومحدش عارف احنا رايحيين على فين ولا حد حتى يقدر يسأل احنا رايحين فين.

أعتقد انت كده فهمت أنا قصدى ايه !

أنا هسألك سؤال انت حد قريبك كبير فى السن أوى ولسه عايش يعنى عنده مثلا 80 سنة ؟؟

فيه طيب كويس, لو مفيش دوّر .

حاول كده تقعد معاه,

حاول تكلمه,

حاول تسأله عن حاجة,

طبعا هتلاقيه ناسى كل حاجة ومش قادر يفكر فى حاجة ومش عارف حتى يتكلم .

هى دى الحقيقة يا اخوانا وهى دى سنة الحياة

طيب ايه رأيكم بقى ان اللى سايقناهو ده حاله !!

هه يقدر يسوق؟؟

يقدر يمّشى بلد الخمسة وسبعين مليون؟؟

أنا أعتقد انه لا,

أعتقد انه مش هو خالص.

أعتقد انه حد تانى خالص

حد عامل حسابه انه يحكم بعده

حد فاكر ان الحكاية لعب عيال

حد فاكر ان ابن البيه الناظر لازم يبقى شاطر علشان هو ابن البيه الناظر

بس ده بعده

إلا بجد يا جماعة لو الحد ده حب يسوق احنا هنعمل ايه هنسلم كده برضه ؟؟؟؟؟؟؟؟؟؟؟

الله أعلم

احنا طلعنا جدعان ... اطلع جدع معانا

يا ريس احنا طلعنا جدعان معاك من 25 سنة واحنا ساكتين شوفنا الذل ومتكلمناش شوفنا الظلم وبرضه سكتنا......
شوفنا البلد بتتباع حتة حتة وسكتنا .....
كل ده كان جدعنة منا....
يا ريس رجالتك فى البلد دايسيين علينا....
وبرضه احنا ساكتين....
يا ريس الشعب مش لاقى لقمة العيش وبرضه ساكت .....
ياريس احنا اتبهدلنا وبعد ده كله بنهتف ونقول نفديك. هتقول ايه بقى شعب جدع !!!!
يا ريس احنا عايزين حاجة واحدة بس ..
زى ما سكتنا على الظلم !
زى ماسكتنا على الفساد!
زى ماسكتنا على السرقة !
خليك يا ريس جدع معانا !
مش هقول انك تتنحى لا سمح الله..
لا ما انا عارف ان اللى جاى مش قد اللى راح ولا نصه ولا حتى ربعه....
يا ريس أبوس أيدك علشان خاطرى وخاطر الشعب الغلبان
ما تجبشى لنا جمال...
ياريس جمال ابنك على دمغنا من فوق ...
بس مش فى دى يا ريس مش هنستنى 25 سنة كمان والله أعلم هيبقوا أقل أو أكتر....
يا ريت يا ريس تسمع لنا ولو مرة واحدة ..
هتسمع يا ريس ؟؟